Këtë të mërkurë GJKKO ka dënuar me 13 vite burg biznesmenin Gentian Malindi, i cili u gjet fajtor në akuzat për “trafik të narkotikëve” dhe “grup të strukturuar kriminal”, për trafikimin e 137 kg kokaine nga Ekuadori, që u zëvendësua me oriz në portin e Pireut. Malindi ishte kërkuar gjykim të shkurtuar ndaj u dënua me 8 vjet e 8 muaj burg.
Kujtojmë se 46-vjeçari u arrestua në Vlorë më 27 tetor pasi prokuroria lëshoi urdhër arrestin nën akuzat për veprat penale “Trafikimi i narkotikëve”, kryer në bashkëpunim, “Grupi i strukturuar kriminal” dhe “Kryerja e veprave penale nga organizata kriminale dhe grup i strukturuar kriminal”. Operacioni në Shqipëri u realizua në kuadër të operacionit ndërkombëtar të koduar “Kuito”, i cili u zhvillua me bashkëpunimin e disa shteteve dhe disa autoriteteve ligjzbatuese. Në të mori pjese policia greke në koordinim me zyrën e DEA-s në Athinë, nën drejtimin e Prokurorisë pranë Gjykatës së Shkallës së Parë për Krimet e Rënda Tiranë.
Malindi dyshohet se në bashkëpunim me shtetasit A. B., 53 vjeç dhe A. M., 35 vjeç, të dy banues në Durrës (të arrestuar në shtator 2019), do të priste në Durrës, 137 kg lëndë narkotike kokainë, e cila u sekuestrua gjatë operacionit.
Kokaina u pikas nga policia greke, e cila ka bërë zëvendësimin e saj me oriz, në Portin e Pireut. Më pas, kanë mbajtur nën vëzhgim lëvizjet e kontejnerit, deri në Durrës, për të zbuluar rrjetin e trafikut të kokainës.
