Një operacion i madh kundër trafikut ndërkombëtar të drogës, pastrimit të parave dhe shpërdorimit të detyrës është ndërmarrë që në orët e para të mëngjesit nga Drejtoria Antimafia e Barit dhe autoritetet shqiptare, në bashkëpunim me Interpolin, Zyrën e Ekspertëve të Sigurisë në Tiranë dhe Policinë e Shtetit.
Aksioni, i koduar “Ura”, ka çuar në lëshimin e 52 urdhër-arresteve për persona të dyshuar si pjesë e rrjeteve kriminale që operojnë në disa shtete. Të ndaluarit dyshohen për përfshirje në trafik ndërkombëtar droge, pastrim parash dhe shpërdorim detyre.
Urdhrat janë lëshuar nga Gjyqtari për Hetimet Paraprake në Bari dhe nga Gjykata e Posaçme kundër Korrupsionit dhe Krimit të Organizuar në Tiranë, ndërsa operacioni është zhvilluar nën koordinimin e Eurojust, Drejtorisë Kombëtare Antimafia të Romës dhe SPAK-ut shqiptar.
Në kuadër të hetimit janë ekzekutuar edhe masa sekuestrimi ndaj aseteve të luajtshme dhe të paluajtshme, si në Shqipëri ashtu edhe në Itali, me një vlerë prej disa milionë eurosh.
Ky operacion është pjesë e një hetimi më të gjerë të përbashkët mes DDA-së së Barit dhe SPAK-ut të Tiranës, që ka në fokus rrjetet kriminale shqiptare të përfshira në trafikun e vazhdueshëm të kokainës dhe heroinës mes Ballkanit, Europës Veriore dhe rajonit të Puglias.
