Hetimet e nisura nga Prokuroria e Rumanisë në nëntor të 2019-ës, kanë vënë në pranga për trafik droge dy shqiptarë.
Njërit prej tyre i është gjetur edhe një licencë avokatie.
Prokuroria rumune me anë të një letërporosie i kërkon informacion palës shqiptare për Fjordi Aliajn dhe Hiqmet Hoxhën.
Këta persona akuzohen për trafikun e 60 kg kanabis, të cilin e kishin blerë në Spanjë dhe do ta shisnin në Rumani.
Nga letërporosia rezulton, se Aliajt i është gjetur edhe një licencë avokatie, shkruan “Panorama”.
Në QKB rezulton se Aliaj ka pasur të regjistruar NIPT-in për ushtrimin e veprimtarisë së avokatisë, të cilën e ka pezulluar në 2012-ën.
Së bashku me shqiptarët po hetohet edhe një shtetas rumun e një grek.
Ata janë arrestuar në flagrancë gjatë trafikimit të lëndës narkotike.
Prokuroria shqiptare aktualisht është duke verifikuar të dhënat e kërkuara nga pala rumune.
Sipas letërporosisë, aksioni për kapjen e tyre është zhvilluar në tre ditët e para të nëntorit.
Dy shqiptarët kanë kontrolluar rrugën, ndërsa droga ishte fshehur në kamionin e drejtuar nga greku.
