SPAK ka përfunduar hetimet dhe ka dërguar për gjykim në Gjykatën e Posaçme kundër Korrupsionit dhe Krimit të Organizuar dosjen ndaj një grupi të strukturuar kriminal, të përbërë nga Adulla Hoxhaj, Almir Gjidiaj, Admir Tutaj, Alban Gjidiaj, Rifat Avdiaj dhe Bojken Turtulli, të akuzuar për trafikim armësh nga Shqipëria drejt Mbretërisë së Bashkuar.
Tre nga anëtarët e këtij grupi kriminal, Adulla Hoxhaj, Bojken Turtulli dhe Rifat Avdiaj, janë arrestuar dhe ndodhen në paraburgim që nga 1 gushti 2024, në kuadër të operacionit të koduar “Inkorporimi”, ndërsa tre të tjerët janë ende në kërkim.
Hetimet e kryera kanë zbuluar se grupi ishte i organizuar në dy nëngrupe që vepronin paralelisht në dy shtete të ndryshme. Nëngrupi që operonte në Shqipëri drejtohej nga Adulla Hoxhaj dhe përfshinte Rifat Hoxhajn, Bojken Turtullin dhe Franko Gjalpin, ndërsa nëngrupi që vepronte në Mbretërinë e Bashkuar drejtohej nga Almir Gjidiaj dhe kishte pjesë të tij Admir Tutajn dhe Alban Gjidiaj.
Gjatë hetimeve janë sekuestruar disa herë armë, para dhe sende të tjera të ndaluara ose të dyshuara se përdoreshin për veprimtari kriminale.
Më 10 prill 2023 në pikën kufitare të Portit të Durrësit dhe më 16 qershor 2023 në Tiranë, janë sekuestruar disa armë zjarri të llojit pistoletë, përfshirë gjashtë “Glock” me numra të fshirë, një pistoletë “Herstal” dhe një “Browning”, si dhe katër karikatorë, 201 fishekë kalibri 9 mm, rreth 1,650 euro dhe 31,700 lekë, si dhe disa pajisje të tjera, përfshirë telefona celularë.
Ndërkohë, më 1 gusht 2024, gjatë kontrolleve të ushtruara kryesisht në banesën e Adulla Hoxhajt, por edhe në ambientet e të dyshuarve të tjerë, janë sekuestruar 24 armë zjarri të llojit pistoletë, një automatik kallashnikov, pjesë të ndryshme armësh, 49 karikatorë, dy thika, 409 fishekë të kalibrave të ndryshëm, një palë pranga, dhjetë pajisje optike dhe lazer, katër automjete, një motor, një palë veshje ushtarake dhe një helmetë e forcave speciale.
Po ashtu, janë sekuestruar edhe pajisje elektronike si celularë, laptopë, një njësi kompjuterike, 290 euro, 13,000 lekë dhe një kartë SIM kosovare.
Pas përfundimit të hetimeve, SPAK ka vendosur që çështja t’i kalojë Gjykatës së Posaçme për shqyrtim në themel.
