Drejtuesja politike e PD për Diasporën, Jozefina Topalli, ka krahasuar rastin e ish-kryeministrit Sali Berisha me atë të Presidentit të zgjedhur të SHBA-ve, Donald Trump.
Topalli bëri komentet e saj në emisionin “Çdo kënd” në A2 CNN, ku tha se kur Trump po përballej me akuza dhe fotografohej si i dënuar, dhe askush nuk e imagjinonte rikthimin e tij në pushtet.
Ajo theksoi gjithashtu se ky është rikthimi i tretë i Berishës, pas ardhjes së tij në pushtet në vitet 1992 dhe 2005.
“Po mendoja Trump në SHBA, ndoshta përpara një viti kur ai ishte nën akuzë, kur i bënin foto si i dënuar, si i akuzuar, askush nuk mendonte se ai ishte në pushtet. Dhe mosha është e njëjtë dhe është rikthyer praktikisht në pushtet. Rikthimi i tretë i Berishës faktikisht ka ndodhur.
I pari në 91, i dyti pas 97 dhe i treti tash. Para pak ditësh një e njohur imja më çoi një video në tik tok, unë skam tik tok. Më kujtohej që ishte periudha e 2021 kur e shpallën non grata, kur Basha me vendim personal e përjashtoi nga partia. Dhe më morën në një emision televiziv dhe më thanë çfarë do bëhet.
Unë i thashë që kam një eksperiencë nga viti 1997, kur Berishën të gjithë e izoluan, ishte më keq se shpallja non grata, kur PD ishte izoluar. Dhe askush nuk besonte se mund ta çonte këtë forcë drejt pushtetit dhe erdhi 2005. E drejta ndonjëherë duket e vështirë në horizont, por nuk është e paarritshme. Procesi ndaj Berishës është iniciuar nga Qeveria”, tha Topalli.
