Situata me COVID-19, në vendin tonë ka ardhur duke u përmirësuar, këtë e ka konfirmuar edhe Komiteti teknik i Ekspertëve në mbledhjen që zhvilluan ditën e djeshme. Zv.ministrja e Shëndetësisë Eugena Tomini në një lidhje Skype për “Wake Up”, ka treguar se kur mund të kemi një rritje të rasteve me COVID-19. Tomini është shprehur se në javën e dytë dhe të tretë të majit pritet një tendencë në rritjen e rasteve. Ndër të tjera ajo ka shtuar se vaksinimi e ka lehtësuar situatën dhe se kjo verë do të jetë ndryshe nga viti i kaluar.
“Në javën e dytë dhe të tretë të majit pritet një tendencë në rritje e rasteve. Por vaksinimi e ka lehtësuar situatën. Kjo do jetë një verë më ndryshe se vera e viti të kaluar.
Për sa i përket vaksinimit dua të theksoj se janë disa rajone si Gjirokastra për shkak të popullsisë së vjetër, ka bërë kalendarin e vaksinimit ndaj Covid -19, pasuar nga Fieri dhe Vlora”, tha Tomini. Shifrat e javëve të fund tregojnë për një rënie të ndjeshme të rasteve të reja, shtrimeve në spitale por edhe humbjeve të jetës. Por, pavarësisht përmirësimit të situatës, të vetmet masa lehtësuese që panë të arsyeshme ekspertët për tu vënë në zbatim, ishin rikthimi i pjesshëm i studentëve në auditorë, vetëm për konsultime dhe sezonin e provimeve.
Ndërkohë do të hiqet dhe karantina 14 ditore për të gjithë ata që hyjnë në Shqipëri nga Greqia dhe Maqedonia e Veriut.
