Tom Doshi ka nisur zyrtarisht fushatën elektorale pavarëisht mesazheve të vazhdueshme të Ambasadës Amerikane për molejimin e kandidimit të tij në zgjedhje. Ai hapi fushatën në kryeqytet, madje nuk harroi të dërgonte një mesazh edhe për Amerikën. Doshi citoi Papën duke thënë se “është një mbështetës i Amerikës”.
“PSD është krijuar në 1991, ne jemi parti e qendrës, përfaqësojmë të majtë, të djathtë, të persekutuar, komunistët, të gjithë që janë bindjet e tyre. Sloganin e kemi “Na jepni besimin t’ju kthejmë shpresën”. Shqiptarët janë të pashpresë, PSD-ja është e vetmja forcë që do t’ju kthejë këtë shpresë. Shqetësimi më i madh është korrupsioni.
Ju citoj thënie të Papës, “korrupsioni është si lebra, që sëmurë dhe vret shpresën”. Unë jam një mbështetës i Amerikës, ka qenë një shpresë për mua që në 1991 por punën më të madhe që ka bërë për shqiptarët, Amerika është reforma në drejtësi. Te kjo reformë unë jam njeriu kyç, që ajo reformë ka kaluar.
Në këto zgjedhje në do të jemi forcë e tretë. Doktori i tamponëve kur më tha që kam bërë 19 mijë tamponë dhe askujt nuk i kam marrë një qindarkë, i thash ku mund të gjej një njeri që mund të përfaqësojë Tiranën më mirë se ty? 19 mijë tampona me zero lekë, pa ambulancë.
Me makinë të vet. Jeni të gjithë figura të pastra, që s’mund t’ju akuzojë kërkush për korrupsion. Detyra jonë është të dhurojmë edhe buzëqeshje sikur ka thënë edhe Nënë Tereza”, ka thënë Doshi gjatë fjalës së tij.
Kujtojmë që emri i Tom Doshit ka qenë shumë i lakuar muajt e fundit në Shqipëri, pasi amasadorja e SHBA, Yuri Kim risolli në vëmendje që ai është shpallur “non-grata” në Amerikë dhe kërkoi nga KQZ që të mos e regjistronte në zgjedhje. Megjithatë këta të fundit e lanë përgjegjësinë në dorë të Prokurorisë për të vendosur për Doshin.
