Peshëngritësi shqiptar, Briken Çalja, garoi sot në Lojërat Olimpike “Tokyo 2020”, në sportin e peshëngritjes. Fillimisht, shqiptari garoi në kategorinë e 73 kg. Në provën e parë në stilin e shkëputjes, Çalja tentoi të çojë lart shtangën në peshën 151 kg, por nuk arriti ta realizonte me sukses.
Në provën e dytë, po me të njëjtën peshë, Çalja arriti ta kalojë me sukses, duke ngritur lart shtangën me 151 kg. Në provën e tretë dhe të fundit në stilin e shkëputjes, Çaljas i duhej të ngrinte peshën 155 kg, por peshëngritësi shqiptar, nuk ia doli dhe garimi i tij u mbyll vetëm në vendin e shtatë në këtë kategori.
Çalja u rikthye sërish në podium, pasi garoi për stilin tjetër me shtytje. Në provën e parë, peshëngritësi shqiptar e nisi stilin e shtytjes me sukses, duke ngritur peshën 184 kg. Në provën e dytë, Çalja provoi peshën 188 kg, por nuk arriti të mbante shtangën lart. Ndërsa në provën e tretë, peshëngritësi shqiptar ishte i suksesshëm, duke ngritur plot 190 kg. Në përfundim, Çalja e mbylli në vendin e katërt garimin, duke mos marrë medalje.
E gjithë vëmendja e shqiptarëve ishte e fokusuar te peshëngritësi shqiptar, i cili konsiderohej si shpresa e vetme për Shqipërinë që të fitojë medalje. Kujtojmë që Kosova ka fituar dy medalje ari deri më tani në “Tokyo 2020”, të dyja në xhudo.
