Durrësi ishte një nga zonat më të prekura nga tërmeti i 26 nëntorit.
Shumë banesa mbetën të dëmtuara, ndërsa në fshatin Jubë, pranë “Kanalit të Kuçedrës”, u ça edhe toka.
Banorët e këtij, fshati janë ende të terrorizuar nga ajo që përjetuan mbrëmjen e tërmetit. N
ë një rrëfim për “Ora News”, njëri prej banorëve shprehet se toka është çarë në një gjatësi prej 100m ditën e tërmetit, por është mbyllur nga vetë njerëzit.
Sipas tij, përpara tërmetit ky segment ishte i kalueshëm, ndërsa tani paraqet rrezik.
“Ka qenë shumë e hapur, është mbyllur me levë nga ne. Atje ka gjatësi prej 100 metra e hapur komplet. Nuk ka qenë e çarë. Është bërë ditën e tërmetit, nuk ka ndodh ndonjëherë”, tha banori.
Një banor tjetër tregon se natën e tërmetit nga toka doli ujë dhe gaz.
“Nuk dinim se çfarë është, pastaj shpërtheu atje te shkallët përpara. Thashë po na shpërthen brenda në shtëpi. Na tmerroi për momentin, thanë se ka dalë edhe si flakë. Ujë dhe gaz”, tregon ai.
Ndërsa banorët e tjerë janë shprehur, se ishte një frikë e jashtëzakonshme, pasi në momentin e tërmetit nga toka ka dalë uji i zi.
Ata janë të frikësuar dhe kërkojnë, që ekspertët të vlerësojnë nëse zona është apo jo e banueshme.
