Ish-kryetari i komunës së Bërxullës, Ymer Marku, është dënuar me 10 muaj e 20 ditë burgim për shpërdorim detyre, pas akuzave për tjetërsimin e 7500 m² tokë me dokumente të falsifikuara.
Marku u arrestua në prill 2024 dhe pas gjykimit të shkurtuar përfitoi ulje dënimi. Gjithashtu, ai është pezulluar për dy vjet nga mbajtja e funksioneve publike.
Për të njëjtën akuzë, janë dënuar edhe ish-kryetari i Komunës, Agim Loci, dhe ish-zyrtari i administratës së tokave, Kujtim Balliu, me 10 muaj burgim secili, dënim që iu pezullua me kusht.
Ndërsa Kujtim Allmeta, i akuzuar për falsifikim dokumentesh dhe pastrim parash, është dënuar me 4 vjet burgim, i cili gjithashtu iu pezullua dhe do të vuajë dënimin me shërbim prove.
Ky hetim ka zbuluar se zyrtarët e Komunës Bërxullë lejuan falsifikimin e dokumenteve dhe regjistrimin e tokës në emër të Kujtim Allmetës, i cili më pas e shiti këtë pasuri për 10 milionë lekë tek Arbër Abazi, nipi i deputetit Sadri Abazi.
Pas këtij skandali, janë ngritur akuza për shpërdorim detyre ndaj zyrtarëve dhe falsifikim dokumentesh ndaj Allmetës, ndërkohë që 7500 m² tokë u sekuestrua nga prokuroria.
