Në Poway të Kalifornisë hebrejtë ishin mbledhur në sinagogë për të marrë pjesë në shërbesën fetare të Pashkëve, ditën e fundit të saj, kur një person i armatosur hyri brenda dhe hapi zjarr mbi besimtarët, duke lënë të vrarë një grua dhe plagosur tre të tjerë.
Personi, i cili u largua nga sinagoga me një makinë dhe u kap më pas nga policia u identifikua si John Earnest, 19 vjeçar nga San Diego. Ai mendohet të jetë autori i një “manifesti”, sipas të cilit personi po ashtu i ka venë zjarrin muajin e kaluar një xhamije.
Kryetari i Bashkisë në Poway, Steve Vaus, tha për televizionin CNN, se kemi të bëjmë me “vrasje të kryer nga urrejtja”. Ai iu referua thirrjeve të përdorura nga vrasësi gjatë hyrjes në sinagogë. Vaus, tha se vrasësi e ka pasur sinagogën si objektiv të sulmit. “Unë mësova se ai ishte dikush që ishte mbushur me urrejtje në zemër, urrejtje për komunitetin tonë hebre.” Sipas njoftimeve të mediave katër viktimat u vendosën në vend të sigurt. Lidhur më këtë sulm reagoi edhe presidenti i SHBA-së Donald Trump.
“Aktualisht duket të jetë krim i kryer nga urrejtja, por ngushëllime gjithë të prekurve, ne do hetojmë të mësojmë gjithçka,” – tha Trump.
Kujtojmë se gjatë Pashkëve katolike ndodhi edhe tragjedia në Sri Lanka, ku mbetën të vdekur më shumë se 350 persona.
