Një lajm i trisht vjen nga bluzat e bardha. Kanë humbur betejën me Covid-19 dy infermierë. Lajmin e bënë të ditur Shoqata e Infermierëve të Shqipërisë.
“Si pasojë e Covid-19, ditën e sotme është ndarë nga jeta një infermieri nga Mati Nerim Vaçi. Shoqata e Infermiereve i shpreh ngushellime familjes dhe kolegeve”- shkruan shoqata.
Ndërkohë, një tjetër infermiere në Lushnje ka ndërruar jetë nga virusi potencialisht vdekjeprurës.
“Serish humbje jete mes Infermiereve nga covid-19. Infermierja nga Lushnja ka nderruar jete pas betejes me kete semundje. Shoqata e Infermiereve i shpreh ngushellime familjes se Erjoles dhe kolegeve te saj”- shkruan më tej.
Kujtojmë se prej javësh tashmë vendi po përballet me një valë të tretë infektimesh, e cila cilësohet dhe ndër më të rëndat që kanë goditur vendin tonë.
Në shkurt u shënua bilanci më i zi me gati 1000 të infektuar përditë dhe shifrat rekord të vdekjeve me 21 persona në ditë.
Në muajin që lamë pas u regjistruan 300 vdekje. Krahasuar me një vit më parë, për shkak të Covid-19 janë shënuar 1500 vdekje më shumë.
Sa u përket masave të marra, deri më tani fasha orare është e kufizuar nga ora 20:00 deri në 06:00 e mëngjesit.
Komiteti Teknik i Ekspertëve ka lajmëruar për një mbledhje jashtë rradhe, duke lënë të kuptohet se do të ketë shtrëngim të masave. Deri më tani dyshimet janë se fundjava do të jetë karantinë për të gjithë dhe orari i lëvizjes do të kufizohet duke nisur prej orës 18:00 e pasdites.
