Një tjetër goditje vjen për opozitarin e burgosur rus, Alexei Navalny në prag të zgjedhjeve parlamentare. Autoritetet ruse kanë bllokuar hyrjen në faqen e tij të internetit. Veç kësaj, u bllokuan fqet e internetit brenda Rusisë edhe për 48 individë e organizata të tjera të lidhura me Navalnyn.
Rregullatori rus i internetit Roskomnadzor tha në një deklaratë për Reuters se kishte vepruar për të bllokuar navalny.com – një nga faqet kryesore të lëvizjes së Navalny – dhe të tjerët me kërkesë të prokurorit të përgjithshëm.
Muajin e kaluar një gjykatë ruse vendosi që organizatat e lidhura me Navalnyn të cilësohen si “ekstremiste” me akuzën se ishin duke u përpjekur të nxisin një revolucion duke kërkuar të destabilizojnë situatën socio-politike brenda Rusisë, një akuzë që ata e mohuan.
Vendimi i shpalli të jashtëligjshëm aleatët e Navalny-t, duke i penguar ata që të marrin pjesë në zgjedhjet e shtatorit për Dumën e Shtetit, dhoma e ulët e parlamentit.
Roskomnadzor tha se faqet që ajo kishte bllokuar kishin ndihmuar lëvizjet e mbuluara nga ndalimi i gjykatës për të shpërndarë propagandë dhe për të vazhduar aktivitetet e paligjshme.
Alexei Navalny, krtik i presidentit rus Vladimir Putin, është duke vuajtur një dënim me 2 vite e gjysmë burg për akuzën e shkeljes së një dënimi me kusht. Ai u dënua pasi u kthye nga Gjermania, ku kurua për një helmim me agjent nervor, për të cilin ka akuzuar vazhdimisht Kremlinin.
