Një tjetër atentat i rëndë ka ndodhur ditën e sotme, i cili ka tronditur jo pak opinionin publik, duke qenë se bëhet fjalë për një biznesmen të njohur, Ferdinand Polian.
Atentati ka ndodhur në fshatin Grudë, të Shkodrës rreth orës 16:30, në kohën Polia kishte marrë nga servisi automjetin e tij dhe ishte duke u kthyer, bashkë me një punonjës të servisit.
Megjithatë nga raportimet e policisë, Polia nuk ka ndërruar jetë në vend, pas mbërritjes së ambulancës, ai është transportuar për në spitalin rajonal të Shkodrës, mirëpo për shkak të plumbave të marrë nuk ka mundur të mbijetojë.
Ferdinand Polia, ose siç njihej ndryshe “Nardi i Bujtinave”, nuk është i panjohur për zonën, pasi jo vetëm punonte në Administratën Rajonale të Zonave të Mbrojtura në Shkodër, por njëkohësisht kishte në pronësi disa bujtina na Theth, vend të cilin e kishte shumë përzemërt dhe e promovonte.
Nga ajo që raportohet, mësohet se autori që ka ekzekutuar biznesmenin ka qenë me një motoçikletë dhe mbante një skafandër në kokë, gjë që e bën gati të pamundur identifikimin e tij.
Vrasësi ka qenë i vetëm dhe pas ngjarjes ai e ka braktisur mjetin tek “Ura e Mesit” duke u larguar në drejtim të paditur.
Deri më tani policia nuk ka ende asnjë autor të dyshuar për ngjarjen, por janë duke punuar për zbardhjen e saj, megjithatë nga ajo që mësohet është se 35-vjeçari nuk ka pasur asnjë precedent penal apo të jetë konfliktuar me dikë, gjë që e bën akoma të mistershme ekzekutimin e tij.
