Mbrëmjen e sotme gazetari investigativ, Artan Hoxha ishte i ftuar në në emisionin “Çim Peka LIVE” ku foli për ngjarjet e fundit kriminale dhe lidhjen e kanabisit me këto ngjarje që kanë tronditur jo vetëm publikun e gjerë por edhe vetë policinë.
Gjatë bisedës në studio Hoxha tha se kanabisi u përhap masivisht në Shqipëri pas komenteve të Edi Ramës për legalizimin e kanabisit mjekësor.
“Më 12 qershor, Rama deklaroi se ligji do miratohet brenda korrikut. Në fakt sot nuk kemi parë as ligj dhe as projektligj. Ky ishte mesazh. Kanabizimi në Shqipëri nuk ka qenë problem policor, por politik,” tha ai, duke shtuar që kanabisi është mbjellë masivisht në vitet parazgjedhore.
Duke u ndaluar te betonizimi i Tiranës me paratë e krimit, Hoxha tha se ‘pylli i kanabisit do kthehet në pyll orbital betoni në Tiranë’.
“Më rezulton që Tirana është kthyer në lavatriçen e parave që vijnë nga drogërat e forta, sidomos nga kokaina. Nëse e shihni se çfarë ndodh në Tiranë, që është një katastrofë në pikëpamje mjedisore. Varfëria shtohet, popullsia ulet dhe çmimet vetëm rriten. Po kush blen në këtë vend?
Nuk di asnjë organizatë kriminale që nuk ka marrë leje për të investuar në Tiranë, përfshi hoteleri, qendra tregtare, ambiente biznesi dhe apartamente banimi.
Ata kanë vetëm një problem: si të mos ekspozohen përballë agjencive të huaja. Kushdo që do të investojë në Tiranë, nuk ka asnjë problem,” tha ai.
