Liderat e Ballkanit Perëndimor janë mbledhur sot për të diskutuar mbi integrimin e vendeve të Ballkanit në Bashkimin Europian. Në këtë takim kanë qenë të pranishëm edhe përfaqësues të Drejtorisë së Përgjithshme të Komisionit Europian për Fqinjësinë dhe Negociatat e Zgjerimit (DG NEAR).
Mësohet se në këtë takim kanë marrë pjesë edhe Kosova dhe Shqipëria, ndërkohë është njoftuar se takimi i radhës do të mbahet në datat 28-29 shkurt në Tiranë.
“Tema të diskutimit ishin përfitimet nga Plani i Rritjes dhe perspektiva e rrugës së integrimit në BE, forcimi i integrimit ekonomik me Tregun Unik të BE-së, si dhe mbështetja e përshpejtimi i reformave kyçe.
Ky ishte një takim përgatitor, në pritje të takimit të radhës të liderëve, të planifikuar në Tiranë në datat 28 dhe 29 shkurt, në ndjekje të objektivave për intensifikimin e përpjekjeve të vendeve të Ballkanit Perëndimor në rrugën drejt BE-së, krijimin e themeleve për hapat e ardhshëm në zbatimin e Planit të Rritjes dhe avancimit të bashkëpunimit dhe ndërveprimit me Komisionin Evropian.
Kujtojmë se Komisioni Evropian, në nëntor 2023, propozoi një Plan të Rritjes për Ballkanin Perëndimor, i cili synon të zgjerojë përfitimet e Tregut Unik të Bashkimit Evropian në rajon përpara anëtarësimit formal, me synim kontributin pozitiv në rritjen ekonomike dhe përshpejtimin e konvergjencës socio-ekonomike me BE-në”, thuhet në njoftimin e Ministrisë së Integrimit të Kosovës.
