Thomas Tuchel ka nisur zyrtarisht punën si trajner i kombëtares së Anglisë, me një kontratë 18-mujore që zgjat deri në përfundim të Kupës së Botës 2026.
Emërimi i tij si pasardhës i Gareth Southgate u konfirmua nga Federata Angleze e Futbollit në tetor, ndërsa sot fillon zyrtarisht angazhimin e tij si tekniku i “Tre Luanëve”.
Tuchel ka zgjedhur si ndihmës ish-futbollistin Anthony Barry, me të cilin ka bashkëpunuar më parë në Chelsea dhe Bayern Munich.
Në dhjetor, ai ishte i pranishëm në shortin kualifikues të Kupës së Botës 2026, ku Anglia u vendos në një grup me Shqipërinë, Serbinë, Letoninë dhe Andorrën.
Pas shortit, Tuchel deklaroi:
“Kam respekt të madh për Serbinë dhe Shqipërinë. Ata kanë lojtarë emocionues dhe trajnerë të shquar. Ndaj Letonisë dhe Andorrës, gjithashtu, duhet të tregohemi seriozë dhe të fokusohemi te kualifikimi. Anglia ka cilësitë për të shkuar larg, por duhet ta dëshmojmë këtë në fushë.”
Ndeshja e parë e Tuchel në krye të Anglisë do të zhvillohet më 21 mars në Wembley kundër Shqipërisë, ndërsa tri ditë më vonë, sërish në shtëpi, Anglia do të përballet me Letoninë.
