Presidentja e Maqedonisë së Veriut, Gordana Siljanovska Davkova, ka reaguar me ashpërsi ndaj thirrjeve raciste dhe gjuhës së urrejtjes që u dëgjuan gjatë ndeshjes së basketbollit mes Maqedonisë së Veriut dhe Rumanisë, të zhvilluar fundjavën e kaluar në Kumanovë.
Në një deklaratë publike, Presidentja e cilësoi ngjarjen si një turp kolektiv që nuk përfaqëson vlerat e shoqërisë maqedonase dhe dënoi ashpër sjelljet e një grupi tifozësh që hodhën parulla të urrejtjes kundër shqiptarëve.
“Reagimet e shumta pas kësaj ngjarjeje janë plotësisht të justifikuara. Për fat të keq, mungesa e kulturës sportive po përsëritet. Tifozë të papërgjegjshëm shprehën urrejtje ndaj bashkëqytetarëve tanë shqiptarë dhe me këtë sjellje na turpëruan të gjithëve”, shkroi Siljanovska në një postim në Facebook.
Ajo theksoi se nuk do të tolerohet më përdorimi i arenave sportive si hapësira për përhapjen e gjuhës së urrejtjes, dhe paralajmëroi masa më të rrepta për të parandaluar raste të tilla në të ardhmen. Sipas saj, edukimi për respektin dhe sportivitetin duhet të nisë që në familje dhe të përforcohet në shkolla.
“Na duhet një alfabet i ri, ai i brohoritjes së shëndetshme dhe sportdashëse, një kulturë që bashkon, jo që përçan”, tha ajo.
Incidenti në Kumanovë përfshiu parulla të rënda me përmbajtje raciste dhe fashiste si: “Maqedoni e pastër”, “Shqiptari i mirë është shqiptari i vdekur” dhe “Dhoma e gazit për shqiptarët”.
Këto thirrje tronditëse, të ngjashme me retorikën e shfarosjes, u dëgjuan në prani të kryeministrit maqedonas dhe zyrtarëve të tjerë të lartë, duke shkaktuar reagime të forta brenda dhe jashtë vendit.
