Raportuesja e Parlamentit Evropian për Kosovën, Viola von Cramon, së fundmi ka folur në lidhje me situatën e tensionuar në veri të Kosovës, pas vendosjes së reciprocitetit të targës. Ajo me anë të një postimi në rrjetet sociale, ka shkruar se si Kosova ashtu edhe Serbia duhet të gjejnë një zgjidhje paqësore për situatën që është krijuar në kufi.
“Serbia dhe Kosova duhet urgjentisht të gjejnë një zgjidhje paqësore dhe të qëndrueshme për situatën e krijuar, në mënyrë që të ketë siguri për të gjithë qytetarët”, ka thënë Cramon përmes një postimi në Tëitter.
Të njëjtën linjë kanë mbajtur edhe raportuesit e tjerë si dhe kryesuesit e delegacioneve nga Parlamenti Evropian, të cilët kanë kërkuar në mënyrë të prerë dhe urgjente që të ulen tensionet mes dy shteteve, pra Kosovës dhe Serbisë.
Përmes një komunikate të përbashkët Vladimir Bilchik, Viola von Cramon, Tanja Fajon dhe Romeo Francu kanë shprehur shqetësimet e tyre për tensionet në Jarinjë dhe Bërnjak dhe kanë kërkuar kthimin e menjëhershëm në dialog të Kosovës dhe Serbisë.
“Duam të shohim tërheqjen e menjëhershme të të gjitha njësive speciale të policisë dhe largimin e bllokadave në rrugë. Ne duhet të ndalojmë aksionet dhe provokimet, gjithashtu edhe retoriken nxitëse, të cilat mund të nxisin tensionet dhe të ndikojnë në jetesën e komuniteteve lokale”, thuhet në komunikatën e përbashkët.
Kërkohet nga liderët në Beograd dhe Prishtinë që të shfrytëzojnë dialogun në mënyrë që të zgjedhin të gjitha problemet ekzistuese, përfshirë këtu edhe lirinë e lëvizjes.
