Monika Kryemadhi ka bërë një thirrje të veçantë për të gjithë shqiptarët.
Me rastin e festave të fundvitit, kryetarja e LSI bën thirrje që tryeza e darkës së ndërrimit të viteve të jetë e mbushur vetëm me produkte shqiptare.
Sipas saj, kjo nismë është shumë e rëndësishme, pasi ndihmon fermerët shqiptarë, të cilëve u është hequr çdo subvencion dhe po përballen me një konkurrencë të pandershme.
Për këtë ajo bën me faj qeverinë shqiptare, të cilën e akuzon se ka lënë pas dore fermerët.
Në fund, Kryemadhi e mbyll me thirrjen : “Blej shqip, konsumo shqip, gëzo shqip”.
“Në festat e fundvitit ashtu sikurse është traditë të gjithë do të shtrojnë tavolinën për darkën e festës. Ndajmë gëzimin, por edhe është momenti të mendojmë shumë më shumë për njëri-tjetrin, sepse kemi nevojë si asnjëherë më parë për njeri-tjetrin. Tavolina e festës duhet të jetë sa më shumë shqiptarë, ndaj të konsumojmë sa më shumë produkte shqiptare. Produkte të shkëlqyera, që i prodhon djersa dhe mundi i papërshkrueshëm i mijëra shqiptarëve të lënë pasdore nga kjo qeveri, që i ka hequr çdo subvencion fermerëve dhe agropërpunuesve shqiptarë.
Tashmë përmes një politike prej shërbëtorësh të interesave të oligarkëve qeveria kërkon që ti vendosë produktet shqiptare edhe përballë konkurrencës sa të pandershme aq edhe antikombëtare. Konsumoni shqip, konsumoni frutat, zarzavatet, bulmetrat, verën, birrën, miellin shqiptar, në ndihmë të gjithë fermerëve dhe prodhuesve të shijes së mrekullueshme shqiptare dhe të mbështetjes për njëri-tjetrin. Gëzuar Viti e Ri jo vetëm me urimin shqip, por edhe me produktet unike shqiptare në tavolinë. Blej shqip, konsumo shqip, gëzo shqip“.
