Prej disa ditësh, Inspektorati Kombëtar i Mbrojtjes së Territorit po zhvillon një aksion intensiv në zonën turistike të Thethit, duke ndërhyrë me fadroma për të shembur ndërtimet pa leje.
Vetëm gjatë kësaj jave janë prishur mbi 60 objekte, përfshirë struktura druri që shërbenin si bujtina apo ambiente pritjeje për turistët.
Ndërkohë, banorët kundërshtojnë hapur ndërhyrjen, duke pretenduar se nuk janë pajisur me urdhrin e prishjes dhe se aksioni po kryhet në mënyrë të njëanshme, pa transparencë.
Sipas tyre, IKMT nuk ka paraqitur asnjë dokument zyrtar që justifikon shembjet, duke çuar në tensione të përsëritura gjatë gjithë javës.
Në terren janë paraqitur edhe përfaqësues të opozitës, të cilët kanë mbështetur qëndrimin e banorëve dhe kanë kritikuar ashpër ndërhyrjen e qeverisë në kulmin e sezonit turistik.
Përplasja ka nisur pas një urdhri të dhënë nga kryeministri Rama për prishjen e ndërtimeve pa leje në këtë zonë të mbrojtur, por banorët kërkojnë dialog dhe shtyrje të afatit deri në fund të sezonit veror.
Deri tani, thirrjet e tyre nuk janë marrë në konsideratë, ndërsa situata rrezikon të përshkallëzohet, pasi shumë familje paralajmërojnë mbylljen e bujtinave në shenjë proteste.
