Faza e parë e hapjes graduale të Kosovës ka ndeshur në rezultate negative, pasi në ditët e fundit numri i rasteve të reja ka qenë i lartë.
Ditën e sotme kurba është rritur sërish pasi Instituti Kombëtar i Shëndetësisë Publike të Kosovës ka njoftuar se sot janë identifikuar 18 raste të reja, nga 8 që u raportuan dje, duke e çuar numrin total të të prekurve në 945.
Rastet pozitive janë raste kontakti nga: komuna e Ferizajit 9 raste, komuna e Gjilanit 6 raste dhe komuna e Vushtrrisë 3 raste.
Sakaq, ditën e sotme janë shëruar 19 pacientë dhe numri i përgjithshëm i tyre është 690, pra më i madh se i rasteve aktive.
Ndërkohë, nga data 13 mars e deri tani 29 persona nuk kanë mundur ta mposhtin Covid-19.
Prej ditësh në Kosovë ka nisur faza e parë e lehtësimit të masave që përfshin periudhën nga 4 deri më 18 maj dhe gjatë kësaj kohe do të hapen bizneset, si: ndërtimtaria dhe patundshmëria, tregtia e automjeteve, pjesërisht tregtia me pakicë, pjesërisht riparimi i artikujve personalë dhe i orendive, si dhe zyrat e konsulencës.
Faza e dytë fillon nga 18 maji deri më 2 qershor dhe gjatë saj do të fillojë operimi i bizneseve, si: tregtia me pakicë, dentistët dhe fizioterapeutët, floktarët, tregu i gjelbër, gastronomia, transporti hekurudhor, transporti urban dhe ndër-urban dhe qendrat e thirrjeve.
Faza e tretë, ndërkaq, hyn në fuqi më 2 qershor e deri në vendimin e radhës dhe do të lejohen transporti urban dhe ndër-urban, taksitë, gastronomia, provimet në arsimin e lartë, testi i maturës dhe arritshmërisë, hapja e kinemave, e teatrove dhe hapja selektive e aktiviteteve sportive.
TETËMBËDHJETË RASTE ME COVID-19 DHE NËNTËMBËDHJETË TË SHËRUAR!
Sot më 14 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 300 mostra të marra nga Klinika Infektive dhe gjurmimi i kontakteve të rasteve në terren. Me SARS-CoV-2, janë konfirmuar 18 raste. Rastet pozitive janë raste kontakti nga: komuna e Ferizajit 9 raste (sipas vendbanimit: 6 raste Talinoc i jerlive dhe 3 raste Rahovicë), komuna e Gjilanit 6 raste (sipas vendbanimit: 4 raste Gjilan dhe 2 raste Përlepnicë) dhe komuna e Vushtrrisë 3 raste (sipas vendbanimit: 3 raste Vushtrri). Sot më 14 maj 2020, janë shëruar edhe 19 pacientë derisa numri i përgjithshëm i të shëruarve deri më sot është gjithsej 690 raste. Nga data 08 shkurt deri më 14 maj 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 10.942 mostra të dyshimta në virusin SARS-CoV-2 dhe prej tyre pozitive rezultojnë gjithsej 945 raste, me gjithsej 29 raste të vdekjes të cilët kanë pasur sëmundje të tjera shoqëruese. Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome. Në nivel global, nga data 31 dhjetor 2019 deri më 14 maj 2020 sipas Worldometers, janë raportuar gjithsej 4.487.842 raste të COVID-19 dhe 300.759 raste të vdekjes.
