Pas rrëzimit të qeverisë Kurti në 15 mars, ditën e sotme presidenti i Kosovës, Hashim Thaçi, ka bërë me dije se ka dekretuar Avdullah Hotin kryeministër të Kosovës.
“Pas letrave që i kam dërguar LDK-së, sot kam marrë një letër kreu i kësaj partie, Isa Mustafa i cili konfirmon se mbështet të gjitha kriteret mbizotërues për qeverinë e re duke siguruar votat e nevojshme në Kuvend.Në demokraci ndodhin dallime, dallimet politike në mes nesh janë një veçori për një demokraci të pjekur. Këto dallime nuk duhet të shihen si justifikim për cenimin apo dëmtimin e Kosovës”.
Në një deklaratë për mediat, Thaçi deklaroi se mocioni i mosbesimit ka qenë legjitim dhe pas shkarkimit të qeverisë, do të veprojë sipas kushtetutës për qeverinë e re.
“Në këtë kohë, mocioni i mosbesimit ndodhi me 2/3 e deputetëve. Në bazë të mandatit kushtetues, do të përpiqem që të veproj kundrejt situatës. Veprimi i mocionit ka qenë legjitim dhe me përputhshmëri me rendin kushtetues”.
Sipas dekretit të nënshkruar nga presidenti, Hoti i propozohet Kuvendit të Kosovës kandidat për kryeministër për të formuar Qeverinë e Kosovës.
Nga ana tjetër pritet edhe reagimi i kryeministrit në detyrë Albin Kurti, i cili ka paralajmëruar më herët se nuk do e pranojë një vendim të tillë dhe po të mos ishin kushtet e krijuara prej pandemisë do organizonte protesta.
Avdullah Hoti është kreu i grupit parlamentar të Lëvizjes Demokratike të Kosovës, teksa ka qenë Ministër i Financave nga viti 2014 deri në vitin 2017 në koalicionin qeverisës PDK-LDK.
