Këtë të hënë pritet të nisë testimi serologjik, për grupet më të rrezikuara nga COVID-19, të cilët janë infermierët në spitalet COVID 1 dhe 2.
Lajmi është konfirmuar edhe nga mjeku Pëllumb Pipero mbrëmjen e djeshme.
“Sapo më erdhi një njoftim që të hënën fillon analiza serologjike me personelin e QSUT dhe besoj edhe me personelin e COVID 2, për të parë ekspozimin dhe nivelin e mbrojtjes dhe për të ditur më shumë rreth situtës qarkulluese të virusit. Është një lajm shumë i mirë që duhet përshëndetur”, tha Pipero duke deklaruar që ky është një vendim i Ministrisë së Shëndetësisë.
Testimi serologjik përcakton me saktësi, nëse një person është asimptomatik me COVID-19, si dhe ato që e kanë kaluar.
Ky lloj testi analizon gjakun, për të parë nëse njerëzit kanë qenë të ekspozuar ndaj një patogjeni të veçantë dhe si ka reaguar sistemi i tyre imunitar.
Testet RT-PCR që po përdoren aktualisht në botë, mund të tregojnë vetëm praninë e materialit viral gjatë infeksionit, por nuk mund të vërtetojnë nëse një person ka qenë infektuar dhe e ka kaluar.
Këto teste do të shërbejnë për të identifikuar individë që kanë zhvilluar antitrupa ndaj virusit.
“Besoj se në një javë analiza mund të merren të dhëna të rëndësishme për të marrë vendime sesi do të vazhdojë më pas”, u shpreh Pipero.
Nuk ka informacion nëse ky testim do të bëhet edhe për popullatën në masë të gjerë.
Kryerja e testimeve masive është theksuar në shumë shtete, si një masë parandaluese për përhapjen e COVID-19.
Në disa shtete si Korea e Jugur apo Singapori, testimi masiv ka dhënë frytet e veta, duke frenuar përhapjen e infeksionit.
