Instituti Kombëtar i Shëndetësisë Publike (IKSHPK) ka njoftuar se do të bëj testime të qytetarëve për koronavirusin e ri në sheshin “Zahir Pajaziti” në Prishtinë më datë 29 dhe 30 dhjetor, prej orës 9:30 deri në 13:00.
“Procedura e marrjes së mostrave bëhet sipas protokolleve të IKSHPK nga ekipet me përvojë të cilat marrin mostra rregullisht në IKSHPK dhe në terren nëpër institucionet e ndryshme sipas indikacioneve epidemiologjike”, thuhet në njoftimin e IKSHPK-së.
Autoritetet shëndetësore në Kosovë thonë se përkundër situatës epidemiologjike e cila ditëve të fundit ka shënuar rënie të rasteve po vazhdon me testimin dhe sensibilizimin e qytetarëve për koronavirusin e ri, që e shkakton sëmundjen COVID-19.
Instituti Kombëtar i Shëndetësisë Publike ka njoftuar se të hënën në Kosovë janë shënuar edhe 8 vdekje të lidhura me sëmundjen COVID-19, që e shkakton koronavirusi i ri. Në raportin ditor të IKSHPK-së, bëhet e ditur se, bazuar në 1.002 mostra të testuara nga personat e dyshuar me koronavirus, 181 kanë dalë pozitive.
Të shëruar nga sëmundja janë regjistruar 407 pacientë. Me shifrat e fundit, numri i përgjithshëm i të infektuarve me koronavirus në Kosovë arrin në 50.801. Prej tyre, 1.317 pacientë kanë vdekur dhe 39.969 janë shëruar. Raste aktive aktualisht janë 9.515.
Me masat e reja kufizuese të vendosura nga qeveria në prag të Krishtlindjes, Operatoret ekonomik lejohen të punojnë nga 05:00-20:00.
Qendrat tregtare lejohen të punojnë nga 05:00-20:00. Shërbimet e hotelerisë dhe gastronomisë lejohen të punojnë nga 05:00-20:00, ndërkaq pas orës 20:00 punojnë vetëm me shërbim “porosi me dërgesë”. Institucionet publike dhe private obligohen të punojnë vetëm me staf esencial, i cili staf përcaktohet me vendim të secilit institucion në veçanti; Transporti publik lejohet të punojë duke shfrytëzuar deri në 50% të kapaciteteve, duke respektuar “Manualin për mbrojtjen nga përhapja e Covid-19”; Taksitë lejohen të punojnë me një (1) pasagjer prapa ose tre (3) nëse janë anëtarë të familjes.
/Gazetareforma.com/
