Apeli i Vlorës ka lënë në fuqi masën “Arrest me burg”, të vendosur disa ditë më parë nga Gjykata e Shkallës së Parë , për Mihal Kokëdhimën.
Vendimi është marrë nga një treshe gjyqtarësh e përbërë nga Skënder Damini, Klodiana Gjyzari dhe Petrit Aliaj, ndërsa prokuror ishte Kleant Zeka.
Gjatë kësaj seance, Kokëdhima është përfaqësuar nga avokati Gëzim Veleshnja, shkruan “Balkanweb”.
Avokatët e Kokëdhimës gjatë seancës në Shkallën e Parë, kërkuan masë më të lehtë, duke ofruar garanci pasurore deri në 3 mijë euro.
Edhe në Apel avokatët e tij kërkuan lehtësimin e masës së sigurisë.
Seanca është zhvilluar me dyer të mbyllura dhe jashtë vëmendjes së medias. Kujtojmë këtu se Mihal Kokëdhima u arrestua pas skandalit me turistët spanjollë.
Ai i ndoqi turistët spanjollë, pasi u larguan nga lokali i tij “Panorma” dhe iu ngjit në kofanon e furgonit, duke qëndruar aty për rreth 3 km.
Pamjet bënë xhiron e mediave botërore, ku Mihal Kokëdhimës i vunë edhe epitetin “Terminator”.
Menjëherë pas arrestimit, IKMT prishi lokalin e tij në Porto Palermo.
