Banorët e fshatit Suk 1 në Roskovec kanë kallëzuar këtë të premte në Prokurorinë e Posaçme Kundër Korrupsionit dhe Krimit të Organizuar (SPAK), kryebashkiaken e Rsokovecit, Majlinda Bufi dhe një grup zyrtarësh të Agjencisë Rajonale të Mjedisit në Fier, Gjirokastër dhe Vlorë si dhe të shoqërisë “Fier Thermoelektrik”.
Banorët kërkojnë ndalimin e ndërtimit të Termocentralit me gaz. Sipas tyre, Termocentrali do të dëmtojë shëndetin dhe do të shpopullojë fshatin e tyre. Pas dorëzimit të kallëzimit, banorët kanë zhvilluar dhe një protestë simbolike para zyrave të SPAK.
Në fjalën e saj para SPAK, Dhurata Malka, anëtare e Këshillit Bashkiak në Roskovec u shpreh se Bufi është një kryebashkiake që nuk mbron interesat e qytetarëve të saj, ndërsa shtoi që SPAK të ndalojë ndërtimin.
Dhurata Malka: Unë jam Dhurata Malka, anëtare e Këshillit Bashkiak në bashkinë e Roskovecit dhe njëkohësisht edhe banore e zonës. Siç na shihni, ne u takuam sërish me ju për herë të pestë për një çështje që shpresuam shumë se do të na zgjidhej atje në bashkinë tonë në Roskovec, në fshatin tonë të bukur Suk 1, por me keqardhje ju them se kjo nuk ndodhi. Nuk ndodhi sepse ne kemi një kryetare bashkie që nuk mbron interesat e qytetarëve të saj. Me sa duket, ajo është bërë palë me kryeministrin dhe dy firmat shfrytëzuese dhe kanë dëshirë t’ua mohojnë lirinë dhe të drejtat afro 33 mijë banorëve të bashkisë së Roskovecit, të këtyre njerëzve punëtorë dhe duarartë. Sot ne jemi shumë këtu. shumëfishi i këtyre që shihni na përcollën për tek ky institucion, te dyert e kësja drejtësie, ndaj ne shpresojmë që kjo prokurori do të marrë vendimet e duhura do të jetë në mbështetjen tonë dhe do të ndalojë zbatimin e këtij projekti në zemrën e hambarit të Myzeqesë, hambarit të të gjithë Evropës, me besim se kjo prokurori do të na marrë në konsideratë shqetësimin tonë madhor, do ta këshillojë kryeministrin ta bëjë Toskanën e premtuar në Roskovec dhe termocentralin për ta shpopulluar.
Bashkia e Roskovecit i dha më 26 Prill “dritën jeshile” ndërtimit të Termocentralit në zonën bujqësore të Suk 1 pavarësisht kundërshtimeve të forta të banorëve të zonës. Ndërsa jashtë banorët protestonin, Këshilli Bashkiak votoi në favor të ndërtimit. Në mbledhjen e shkuar projekti hasi kundërshtime dhe mes këshilltarëve, disa prej të cilëve dhe iu bashkuan fermerëve. Projekti është kundërshtuar nga banorët e zonës dhe fermerët. Ata shprehen se ky projekt do të jetë vdekjeprurës për zonën pasi prania e tij do të shkatërrojë një sipërfaqe bujqësore prej 700 hektarë me sera.
