Mbrëmjen e djeshme Shqipëria u trondit nga një tërmet i fuqishëm.
12 shtëpi rezultojnë të dëmtuara në Klos pas tërmetit me magnitudë 4.7 të shkallës Rihter. Banorët e Klosit, ku ishte dhe epiqendra e tërmetit të mbrëmshëm e kanë kaluar natën jashtë.
Bëhet me dije se tërmeti i fuqishëm ka shkaktuar panik te banorët, të cilët kanë qenë të prekur nga tërmeti i kaluar dhe shtëpitë e tyre kanë pasur dëmtime të menjëhershme. Lëkundjet e natës së kaluar kanë thelluar akoma më shumë dëmtimet, teksa bëhet e ditur se tre banesa janë më të prekura.
Sipas Institutit të Gjeoshkencave raportohet se epiqendra e tërmetit ishte 3 kilometra në jug të Klosit, prapa Malit të Dajtit, ndërsa lëkundjet janë ndjerë më së shumti në Dibër, Tiranë, Durrës dhe Lezhë.
Ndërkohë disa banesa gjithashtu kanë rezultuar të dëmtuara që prej tërmetit të ndodhur në vitin 2019. “Banorët janë detyruar të kthehen sërish në banesë për shkak të kushteve të vështira të motit, dhe pse banesat u mbetën të dëmtuara që prej tërmetit të 2019”, raporton “News 24”.
Në Durrës raportohet se disa lagje kanë mbetur pa energji elektrike. Ndërkohë në qytetet e tjera të vendit është raportuar se lëkundjet e tërmetit ishin të forta dhe kanë ngjallur panik tek qytetarët.
