Pas katastrofës natyrore që ka goditur sot Turqinë dhe Greqinë, ku si pasojë e një tërmeti të madh ka pasur shkatërrim dhe viktima, edhe Shqipëria është solidarizuar me këto shtete.
Presidenti Ilir Meta, ka shprehur mbështetjen e tij por dhe keqardhjen me popullin grek dhe turk, që u goditën pak më parë nga tërmeti i fuqishëm me magnitudë rreth 7 të shkallës Rihter.
Meta ka shkruar në ‘Facebook’ se, i gjithë populli shqiptar i’u qëndron pranë popujve të dy vendeve mike, me urimin për të përballuar këtë situatë të vështirë dhe lehtësuar dhimbjen familjeve që kanë humbur të dashurit e tyre.
Ja mesazhi i plotë i Presidentit Metës:
“Thellësisht i tronditur nga tërmeti që goditi këtë mesditë ishullin grek të Samosit dhe preku rëndë edhe qytetin e Izmirit.
Lëkundjet e tërmetit u ndjenë në 4 shtete, më së shumti në Turqi e Greqi, por edhe në Bullgari deri edhe në Shqipëri.
Ky është një moment solidariteti njerëzor dhe reflektimi për t’u qëndruar pranë familjeve të viktimave dhe autoriteteve të Turqisë dhe Greqisë për të përballuar dëmet e shkaktuara nga kjo fatkeqësi natyrore.
Unë dhe gjithë populli shqiptar u qëndron pranë popujve miq Turk dhe Grek, me urimin për të përballuar këtë situatë të vështirë dhe lehtësuar dhimbjen familjeve që kanë humbur të dashurit e tyre.
Shqipëria do t’u gjendet pranë vendeve mike me të gjithë kapacitetet e mundshme të saj”.
/GazetaReforma.com/
