Midis të plagosurve të tërmetit tronditës që goditi brigjet e Turqisë dhe të ishujve grekë, ndodhet edhe një i mitur me kombësi shqiptare. Eriko Mane nga Lezha, mësohet se ka mbetur i lënduar rëndë në ishullin grek të Samos.
14-vjeçari ka pësuar goditje në kokë, në këmbë si edhe ka thyer krahun dhe teksa gjendet i shtruar në spitalin e fëmijëve në Athinë shprehet:
“Ju falënderoj shumë që po më dërgoni mesazhe, edhe po kërkoni zgjidhje për mua. Faleminderit shumë dhe gjithçka do shkojë mirë”.
14-vjeçari u operua në këmbë dhe gjendja e tij shëndetësore aktualisht është e mirë dhe mjekët thonë se ndodhet jashtë rrezikut për jetën. Mane u vizitua edhe nga ambasadorja shqiptare, Luela Hajdaraga.
Në Samos raportohet se kanë mbetur të plagosur 19 persona, ndërsa dy adoleshentë kanë humbur jetën pasi mbi ata u shemb një mur.
