Një tërmet i fortë prej 3.9 ballë të shkallës Rihter ka goditur rajonin e Mlladenovcit në Serbi, ka bërë të ditur qendra sizmologjike e Evropës.
Tërmeti ka ndodhur mbrëmë rreth orës 23:30, rreth 44 kilometra në verilindje të Beogradit.
“Gjithçka shkundej. Shumëkujt i kanë rënë fotografitë dhe sendet nga vitrinat”, ka thënë një qytetar nga Mlladenovci.
Fillimisht ishte dëgjuar një goditje e fuqishme dhe më pas gjithçka kishte filluar të tundet, siç edhe e dëshmojnë pamjet e kamerave të sigurisë.
Më poshtë mund të shihni sesi në momentin kur fillon tërmeti, edhe shtyllat e ndriçimit publik fiken dhe aktivizohen alarmet e veturave.
Kujtojmë që një tërmet shkatërrues që goditi Shqipërinë më 26 nëntor dhe kjo ishte një mësim për shtetet e Ballkanit, por shumë pak prej tyre kanë nxjerrë mësime nga e kaluara.
“Nëse nuk merren masat e nevojshme, rajoni do të vazhdojë të vuajë”, tha Okan Tuysuz, profesor i gjeologjisë në Universitetin Teknik të Stambollit.
“Ne jetojmë në një rajon që është shumë aktiv sizmikisht”, tha ai për BIRN, megjithatë “vendet e rajonit vazhdimisht nuk ndjekin politikat e nevojshme. Kjo është arsyeja pse dëmi është kaq i madh.”
“Vende si Japonia dhe Shtetet e Bashkuara, të cilat janë gati dhe ndjekin politika të rrepta, nuk vuajnë as në tërmete shumë të mëdhenj. Por tërmetet më të vogla mund të shkaktojnë dëme të mëdha në rajonin tonë sepse ne nuk jemi gati.”
