Tërmeti 4.1 ballë që ra mëngjesin e sotëm risolli frikën e panikun te qytetarët, si tërmeti 6.4 ballë në 26 nëntorin e vitit të kaluar. Tërmeti i sotëm e kishte epiqendër zonën 2 km në veri të Ishmit dhe me një thellësi prej 2 km.
Rreth tërmetit të sotëm, ka folur edhe sizmiologu Edmond Dushi, i cili ka theksuar se lëkundje të tilla janë të zakonshme në vazhdën e paslëkundjeve nga tërmeti i fuqishëm i vitit të kaluar dhe se qytetarët nuk duhet që të frikësohen apo që të ndjejnë panik.
Sizmiologu ka shpjeguar se “qetësimi tektonik i tokës”, do të dojë shumë kohë, pas goditjes së fortë që mori nga tërmeti i 26 nëntorit të vitit 2019.
“Relaksimi tektonik i tokës do të dojë kohë të gjatë. Këto tërmete çojnë dhe në tërmete të tjerë moderuar. Është një zonë e konsiderueshme në kuptimin e tektonikave.
Ky tërmet në zonën lokale patjetër që është ndjerë sepse është në sipërfaqe. Në raport me pasgoditjet, ky është një tërmet i moderuar dhe është vijimi i asaj që ka filluar në 26 nëntor të 2019.
Mund të ketë dhe shpërthime të kësaj energjie, por smund ta përcaktojmë kur do jetë lëkundja e radhës, as kohën dhe as epiqendrën e saj. Nuk ka nevojë për panik sepse janë lëkundje të zakonshme”, ka deklaruar sizmiologu Dushi./Gazetareforma.com/
