Kandidati i pavarur për Bashkinë e Mirditës, Gjon Ndoj është tërhequr nga gara. Këtë njoftim e ka bërë të ditur vetë Ndoj, në rrjetin social Facebook.
Sipas tij kjo ka ndodhur për shkak të situatës anormale që është krijuar sot në vend, ku në disa qytete të Shqipërisë ka pasur përplasje të ashpra mes policisë dhe qytetarëve.
Edhe pse i tërhequr zyrtarisht nga gara, Ndoj i kërkoi të gjithë simpatizantëve të tij që të mos shkonin për të votuar.
“Unë nuk mund të bëhem fasadë e kryeministrit Edi Rama prandaj kam vendosur se më 30 qershor unë nuk do të jem kandidat për kryetar bashkie në Mirditë. I kërkoj të gjithë atyre që duan të më votojnë që mos të shkojnë të votojnë në zgjedhje dhe të jenë mirëkuptues ndaj qëndrimit tim,“- u shpreh Ndoj.
Deklarata e Gjon Ndoj:
Të nderuar miq. Jam sot para jush për të dhënë një njoftim dhe mesazh. Jam regjistruar si kandidat i pavarur për Bashkinë Mirditë. Kur unë kam deklaruar kandidimin tim situata politike ka qenë e qetë por paskemi qenë të gabuar të gjithë sepse e shihni edhe vetë se si është situate sot. Të nderuar miq, kisha vendosur që të vazhdoja garën edhe pse PD-ja u tërhoq nga gara.
Por kjo gjë nuk mund të ndodhë më pas urdhërit të presidentit Ilir Meta. Unë e ndërpreva fushatën. Unë do të jem në lojë nëse do të ketë një datë tjetër. Unë nuk mund të bëhem fasadë e kryeministrit Edi Rama prandaj kam vendosur se më 30 qershor unë nuk do të jem kandidat për kryetar bashkie në Mirditë.
I kërkoj të gjithë atyre që duan të më votojnë që mos të shkojnë të votojnë në zgjedhje dhe të jenë mirëkuptues ndaj qëndrimit tim. Në situatë e tillë ka qenë vetëm në kohën e Hoxhës.
