Kuvendi është tërhequr nga ndryshimi i rregullores që parashikonte që gazetarët të mos lejoheshin të merrnin pjesë në mbledhejt e komisioneve.
Kryeparlamentari Gramoz Ruçi ka firmosur shkresën që do të lejojë gazetarët të ndjekin mbledhjet parlamentare. Ndërkohë, operatorët do mund të marrin pamje në 5 minutat e para të mbledhjeve dhe më pas do të vihen në dispozicion pamje nga sistemi.
Ndër të tjera Kuvendi është tërhequr edhe nga vendimi që gazetarët të shoqërohen nga punonjësit e gardës, ndërsa është konsideruar i nevojshëm vetëm kontrolli fillestar.
Vendimi fillestar për moslejimin e gazetarëve në mbledhjet e komisioneve parlamentare shkaktoi reagime të shumta, madje jashtë parlamentit disa gazetarë protestuan, ndërsa më vonë pati edhe një takim mes palëve.
“Nisur nga këto reagime në shtyp dhe jo vetëm, në datë 11 qershor në ambientet e Kryesisë së Kuvendit u zhvillua një takim me përfaqësues të medias, lidhur me ndryshimet e Rregullores, si dhe ndryshimet e reja që ka pësuar sistemi audio-video i transmetimit të mbledhjeve të komisioneve parlamentare. Në këtë takim morën pjesë përfaqësues të Unionit të Gazetarëve Shqiptarë, gazetarë të akredituar të Kuvendit dhe përfaqësues të tjerë të medias”, thuhet në hyrje të shkresës ku pranohet kërkesa e gazetarëve për të vijuar të jenë në mbledhjet e komisioneve.
