Këtë të mërkurë do të dalin para togave të zeza 3 turistët e huaj të cilët tentuan të hyjnë fshehurazi në Uzinën e Përpunimit të Armëve në Gramsh pasditen e së dielës. 2 shtetasit rus Svetlana Timofoeva, Mikhail Zorin dhe 25-vjeçari ukrainas Fjodor Mihajlov, do të dalin para togave të zeza të gjykatës së Elbasanit ku do të njihen me masën e sigurisë.
Ditën e djeshme, prokurori i çështjes Kreshnik Ajazi dorëzoi në gjykatë kërkesën për caktimin e arrestit në burg për tre të huajt. Ata akouzohen për 3 vepra penale, ku përfshihet sigurimi i informacionit të klasifikuar, goditje për shkak të detyrës ndaj efektivëve, si dhe mbajtja pa leje e municioneve luftarake. Kjo e fundit është ngritur nga prokuroria, pasi në automjetin e tyre u gjet edhe një plumb.
Kujtojmë që ditën që ndodhi ngjarja 3 të huajt që paraqiteshin si turistë kanë tentuar të hyjnë në Uzinën e Armëve në Gramsh, dhe janë vënë re nga dy ushtarakët shqiptarë që kanë qenë në krye të detyrës, Ardi Bici dhe Ardjan Xhaka.
Në momentin që ushtarakët shqiptarë janë afruar dhe ju kanë kërkuar që të largohen, ata janë sulmuar nga shtetasit e huaj, të cilët kanë përdorur sprije. Pas këtij momenti dy ushtarakët shqiptarë janë dërguar në Spitalin e Traumës ku kanë marrë ndihmën mjekësore, ndërsa tre shtetasit e huaj janë ndaluar nga Drejtoria e Policisë së Elbasanit.
