Policia e Tiranës ka arrestuar një 53-vjeçar, i cili është infermier, një ditë pasi tentoi të vriste veten duke përdorur një armë zjarri kallashnikov në shtëpinë e tij. Ky person u dërgua me plagë në spital dhe më pas u arrestua për mbajtje të armës pa leje.
Në një njoftim për shtyp, policia shpjegon situatën: “Specialistët për Hetimin e Krimeve të Komisariarit të Policisë Nr. 1 arrestuan shtetasin A. T., 53 vjeç, banues në Tiranë, pasi mbante pa leje në banesë një armë zjarri kallashnikov, me të cilën ka tentuar të vetëvritet ditën e djeshme.”
Në të njëjtën deklaratë, policia njofton edhe për një tjetër incident: “Specialistët e Komisariatit të Policisë Rrugore Tiranë arrestuan shtetasin D. B., 30 vjeç, banues në Tiranë, pasi ka aksidentuar një këmbësore, shtetasen M. M., 46 vjeç, e cila tani ndodhet në spital nën kujdesin e mjekëve.”
Materialet për të dy rastet janë kaluar tek Prokuroria për veprime të mëtejshme.
