Për herë të 35-të me radhë, Kuvendi i Kosovës nuk ka arritur të konstituohet pas zgjedhjeve të mbajtura më 9 shkurt.
Deputetët dështuan sërish të votojnë kryetarin e ri të Kuvendit, ndërsa mungesa e konsensusit politik ka lënë vendin prej më shumë se katër muajsh pa institucione funksionale.
Që prej nisjes së seancës konstituive më 15 prill, janë zhvilluar 27 përpjekje pa sukses për të ngritur komisionin që mundëson votimin e fshehtë të kryeparlamentarit, një procedurë që kërkon dakordësinë e PDK-së, LDK-së, AAK-së dhe Listës Serbe, të cilat vazhdimisht kanë refuzuar të propozojnë anëtarë.
Kandidatura e vetme, Albulena Haxhiu e Lëvizjes Vetëvendosje, nuk ka marrë 61 votat e nevojshme në asnjë nga votimet e hapura, ndërsa partitë kundërshtare e shohin atë si një figurë përçarëse.
Ndërkohë, Vetëvendosja, fituese e zgjedhjeve këmbëngul se ka të drejtën kushtetuese për të propozuar kandidatin për kreun e Kuvendit dhe nuk tërhiqet nga emri i Haxhiut.
Çështja është tashmë në dorë të Gjykatës Kushtetuese, ku partitë opozitare të legjislaturës së kaluar kanë kërkuar pezullimin e seancave derisa të merret një vendim për ligjshmërinë e mënyrës së votimit.
Në një përpjekje për të zgjidhur ngërçin, LDK ka dalë me një plan prej 15 pikash për krijimin e një qeverie uniteti me pjesëmarrjen e të gjitha forcave politike. Por propozimi është hedhur poshtë nga Vetëvendosje, ndërsa PDK dhe AAK mbështesin formimin e një qeverie pa këtë forcë politike.
Pavarësisht alternativave të propozuara, rruga drejt formimit të Qeverisë mbetet e bllokuar për sa kohë Kuvendi nuk zgjedh kryetarin dhe pesë nënkryetarët e tij, hap i domosdoshëm për të kaluar në fazën e emërimit të ekzekutivit.
Përballë kësaj krize politike të zgjatur, faktori ndërkombëtar ka intensifikuar thirrjet për përgjegjshmëri dhe zhbllokim të institucioneve, ndërsa vendi përballet me sfida të rëndësishme të brendshme dhe ndërkombëtare.
Seanca e radhës pritet të mbahet më 23 qershor, por me të njëjtën përbërje dhe pa sinjale kompromisi, zgjidhja duket ende larg.
