Në kuadër të tensioneve në kufirin Ukrainë-Rusi si edhe ambicieve të kësaj të fundit për të kërcënuar kontinentin me ushtri dhe destabilitet, forcat e NATO-s kanë organizuar një mori stërvitjesh ushtarake në zona të ndryshme të Europës duke i pagëzuar me emrin “NeptunStrike”.
Përmes një postimi në rrjetin social Facebook, faqja e forcave të NATO-s në Letoni, ku bëjnë pjesë edhe ushtarë nga Shqipëria, shkruan se gjatë ditëve të fundit është testuar aftësia e kësaj aleance për t’iu përgjigjur çdo sfide që kërcënon sigurinë. NATO është organizuar përballë kërcënimin rus duke furnizuar me armë dhe municione Ukrainën në rast të ndonjë pushtimi nga Rusia.
Faqja ka publikuar edhe foto nga aeroplanmbajtësja “USS Harry Truman”, e cila pak ditë më parë kreu manovra pranë ujërave shqiptare bashkë me anijet dhe avionët që e shoqërojnë gjithnjë. Kujtojmë se marrëdhënia e Shqipërisë me NATO është në vijë pozitive. Marrja e ftesës së anëtarësimit në NATO (në Samitin e Bukureshtit 2 prill 2008) dhe anëtarësimi me të drejta të plota në Samitin e Strasburg&Kehl, 2 prill 2009, finalizoi ato përpjekje dhe atë aspiratë mbarë shqiptarë për anëtarësim në NATO.
Ende, publiku shqiptar mbetet në treguesit më të lartë të mbështetjes së anëtarësimit të vendit në NATO dhe pjesëmarrjes në misione të drejtuar nga NATO jashtë rajonit. Sondazhet zyrtare nxjerrin një mbështetje rreth 89% të shqiptarëve për NATO.
