Kushtet atmosferike shumë herë kanë nxjerrë në pah parregullsitë e mëdha që bëhen në mirëmbajtjen e disa akseve rrugore në vendin tonë. Në janar të vitit 2021, një pjesë e rrugës në Borsh u dëmtua nga shirat, edhe pse ARRSH-ja në 2017-ën kishte finalizuar një tender mirëmbajtjeje për këtë rrugë me vlerë rreth 13 milionë euro.
Por në maj të vitit 2021 ARRSH-ja me në krye ish-drejtorin e saj, Ergys Verdho i hapi rrugë një tenderi të ri për këtë rrugë dhe shpalli fituese kompaninë Gener 2 të Bashkim Ulajt.
E gjithë procedura karakterizohej memungesë të konkurrencës, pasi në garë mori pjesë vetëm kjo kompani, duke ngritur dyshime se procedura emergjente është përdorur për të evituar një garë reale dhe për të paracaktuar fituesin.
Kompania Gener 2 e Bashkim Ulajt paraqiti një ofertë shumë pranë fondit limit, me vlerë 1.3 milionë euro. Oferta gati sa fondi limit është produkt i ’emergjencës’ dhe mungesës së konkurrencës, pasi kompania ofertuese nuk ka frikë nga oferta të tjera më të ulta.
Në janar 2023, KLSH ushtroi një kontroll të veprimtarisë financiare të ARRSH.
Përpos të tjerave, KLSH konstatoi abuzim me zbatimin e kontratës nga Gener 2, për të stabilizuar shkarjen e rrugës. Sipas Kontrollit të Lartë të Shtetit nga ky tender është shkaktuar një dëm ekonomik rreth 800 mijë euro, pra më shumë se sa gjysma e vlerës së tenderit, përmes punimeve të pakryera, fryrjes së kostos, manipulimit të projektit dhe deformimit të preventivit të punimeve.
Por historia nuk mbaron me kaq!
Në prill të vitit 2017, Autoriteti Rrugor Shqiptar, asokohe me në krye Dashamir Xhikën, shpalli fitues kompaninë Salillari, të Pëllumb Salillarit të tenderit me vlerë rreth 13 milionë euro, për mirëmbajtjen e aksin kombëtar Vlorë-Sarandë, ku përfshihet edhe rruga e Borshit.
Salillari ngërhyri fillimisht në pjesën e shembur, por kjo ndërjyrje në rrugë nuk po e stabilizonte situatën dhe kostoja po rritej. Në fushën e lojës hyri sërish ARRSH-ja me thesin e madh të parave publike, duke bërë dy tendera të dyshimtë për një shërbim.
Në rastet kur shembet ndonjë tunel apo rrugë, ARRSH është gati me thesin e parave në dorë, duke qetësuar kontraktorin, që në shumicën e rasteve është një nga 7-8 oligarkët.
Megjithatë, rasti i Borshit është i paprecedentë dhe sfidë për SPAK-un. Janë bërë dy tendera për një shërbim.
Vjedhja është konstatuar nga KLSH, organi më i lartë i kontrollit financiar në vend, ashtu siç është SPAK-u struktura më e lartë hetimore.
Salillari, gjatë viteve të fundit, ka marrë mbi 200 milionë euro tendera publike, nga të cilët rreth 85 milionë euro nga ARRSH-ja. Tenderat janë firmosur nga të gjithë drejtorët e ARRSH, si ata që sot janë në burg, ata që kanë qenë në burg dhe janë liruar, si nga ata që pritet të futen në burg.
Ndërsa, Bashkim Ulaj është ndoshta përfituesi më i madh i të gjitha kohrave i parave dhe pasurive publike.
Duke përfshirë edhe koncensionin Milot-Fier, përfitimet e tij nga paratë publike parashikohet të shkojnë mbi 1.3 miliardë euro, pa llogaritur hidrocentralet abuzive në Valbonë, guroret në Krujë, fibrat optike, kullat apo tentativën për të përlarë 32 milionë euro me kompaninë false DH Albania. Pa llogaritur planet për disa koncensione të reja. Pas mbitokës, synohet nëntoka.
Si për ironi, te ballkoni i pallatit të tij, del çdo natë Sali Berisha duke denoncuar korrupsionin, edhe pse kur vjen puna për të denoncuar raste të mëdha korruptive hesht.
Ashtu siç heshti për kullën më të madhe që po ndërtohet në Ballkan, kulla mbrapa lulishtes të Operas dhe Baletit, ashtu siç po hesht edhe për “investimin” e madh strategjik në Sazan, ku dhëndri i Trump po merr perlën shqiptare pa asnjë garë, veçse është mik i Ramës!
