Drejtori i Institutit të Mjekësisë Ligjore, Bledar Xhemali nuk u ndahet skandaleve. Përveç veprave me nam, si lënia e të vdekurve në dysheme, instituti shpërdoron vazhdimisht fondet edhe në tenderët pa garë. Më datë 19 tetor 2023, Xhemali ka hapur tenderin me objekt “Shtim kati dhe rikonstruksion i IML-se dhe morgut” me fond limit 566 milionë lekë.
Nuk argumentohet se për çfarë arsye do të shtohet një kat në godinën 4-katëshe, por nuk është çudi që ky tender të jetë hapur si justifikim për të nxjerrë nga arka afro 500 mijë euro.
Sipas të dhënave nga dokumentet e tenderit, janë 3 kompani që kanë bërë oferta. Por, edhe pse kishte mjaftueshëm propozime, Xhemali zgjodhi rrugën abuzive për ta firmosur kontratën.
Në nëntor 2023, kur është mbajtur tenderi, drejtori kishte skualifikuar 2 oferta, madje njëra prej tyre ishte më e lirë se ajo e fituesit. Si përfundim, është lënë e vlefshme vetëm oferta e paraqitur nga bashkimi i firmave “Rafin Company” shpk – “Ndregjoni” shpk. Kështu, pa kurrfarë konkurrence, fitorja është dhënë në formë dhurate për pronarët Renido Petritaj dhe Xhetan Ndregjoni.
Duke parë abuzimin në procesin e prokurimit, Open Data Albania e ka listuar tenderin me ‘Red Flag’, shenja që tregon risk të lartë korrupsioni. Në fakt kjo njollë e kuqe i takon së pari Xhemalit, i cili abuzon duke shfrytëzuar postin që ka.
E shkuara e errët e Bledar Xhemalit
Sakaq, kjo aferë na rikthehu edhe njëherë prapa në kohë, në skandalet dhe të shkuarën e errët të Bledar Xhemalit në krye të Institutit të Mjekësisë Ligjore. Ai është emëruar në detyrën e drejtorit të Mjekësisë Ligjore që në vitin 2014 nga ish-ministri i Drejtësisë Nasip Naco.
Gjatë bashkëqeverisjes 6-mujore PS-PD, ish-ministri i drejtësisë Gazmend Bardhi e shkarkoi nga detyra e drejtorit të Mjekësisë Ligjore për shkak të shkeljeve të rënda. Inspektimi, sipas informacionit, zbuloi se Xhemali kishte kryer shkelje të rënda administrative dhe ishte përfshirë në akte ekspertimi të pavërteta.
Bardhi, atëkohë, e çoi drejtorin Xhemali në ndjekje penale, por ky i fundit, e paditi në Gjykatën Administrative, që i dha të drejtë për të vazhduar punën. Kështu. në shtator 2017, Xhemali u rikthye në detyrë..
Në vitin 2018, Mjekësia Ligjore u përfshi në një tjetër skandal, ku një punonjës funerali privat sillej si “drejtor nate” te Morgu i Tiranës. Ky punonjës kishte çelësin e Morgut dhe tërhiqte prej andej kufomat dhe i kalonte tek agjencia e vet.
Por edhe pas këtij skandali, drejtori Xhemali nuk pati asnjë pasojë duke vazhduar punën qetësisht. Por më “i famshëm”, drejtor Xhemali u bë kur dolën pamjet horror të të vdekurve të shtrirë në dysheme gjatë periudhës së pandemisë COVID -19.
Ndërkohë, në qershor 2023, Xhemali zhvilloi një tjetër tender të dyshimtë, atë me objekt “Blerje pajisje autopsie dhe laboratorike”.
Ky tender kishte si fond limit shifrën prej 25,833,000 lekë (pa TVSH) ose rreth 300 milionë lekë të vjetra me TVSH. Nga dokumentet e tenderit del se kanë marrë pjesë vetëm tre kompani.
Dy prej tyre kanë hyrë në tender, por nuk kanë paraqitur ofertë ekonomike, duke lënë të kuptohet se fituesi është i paracaktuar. Për rrjedhojë tenderin e ka marrë e vetmja kompani që ka dhënë ofertë, “KRIJON” shpk në pronësi të Piro dhe Fotion Zogës.
Kush i fitoi paratë e rikonstruksionit të Morgut?
Biznesmeni i ndërtimit Nefir Petritaj kontrollon tre kompani bashkë me të birin Renido Petritaj, përmes të cilave kanë marrë tendera me vlerë rreth 32 milionë euro.
Kompania kryesore është 2 F Construcion LTD, me emër të ndryshuar në Rafin Company, me pronar Renido Petritaj.
Nga viti 2017 dhe deri më tani, Renido Petritaj ka arritur të fitojë 80 tendera publikë me një vlerë rreth 34 miliardë lekë ose 32 milionë euro, e vetme dhe në bashkëpunim, një shifër e jashtëzakonshme për një kompani që e ka nisur nga zero në 2017, me kapital 100 lekë.
Gjysmën e vlerës së tenderave i ka marrë nga Bashkia e Tiranës, nën dyshime të forta të një lidhje klienteliste.
Në 31 janar 2022, Rafin Company, me pronar Renido Petritaj mori tenderin me vlerë 5 milionë euro për ‘ndërtim pedonale, pistë vrapimi dhe korsi biçikletash në liqenin e Farkës’.
Fituesi dyshohet se është paracaktuar pasi kompanitë e tjera pjesëmarrëse në garë si Varaku, Zdravo etj., nuk paraqitën dokumentet më elementare. Më herët, Rafin Company dhe Zdravo kishin fituar një tender po nga Bashkia Tiranë për mirëmbajtje të objekteve arsimore, pa garë.
Në të njëjtën formë, pra me kompani që merrnin pjesë në procedura fiktivisht, “Rafin Company” mori edhe tenderin me vlerë 3 milionë euro për Rindërtimin shkollës 9 vjeçare “Lidhja e Prizrenit”. Fasadën në këtë rast e kanë bërë kompanitë “Udha” dhe “Ulëza”, të lidhura me njëra-tjetrën dhe që kanë marrë tendera të tjerë nga e njëjta njësi vendore, Bashkia Kamëz, që i dha tenderin 3 milionë euro
Me kompaninë “Udha”, “Rafin Company” ka marrë po ashtu një tender për rindërtimin me vlerë 4 milionë euro nga Fondi Shqiptar i Zhvillimit.
Me të njëjtën skemë, Renido Petritaj ka fituar edhe tenderat mirëmbajtje e rrjetit elektrik, hidraulik dhe dyer të brendshme në Konviktet e Shkollave të Mesme, Bashkia Tiranë, me vlerë 350 mijë euro, si dhe tenderin për mirëmbajtje e thellë në objekte publike, Bashkia Tiranë, me vlerë 300 mijë euro.
Pra, të gjithë e duan Renidon dhe i xhirojnë miliona euro nga buxheti i shtetit! Së fundmi, më 20 dhjetor 2023, ministri Niko Peleshi i firmosi kësaj kompanie tenderin 2 miliardë lekë për infrastrukturën në shkollën “Skënderbej” Tiranë. Edhe pse kishte oferta më të ulëta, Peleshi ia xhiroi paratë firmës së Renido Petritajt. Një pyetje lind për zyrtarët e Agjencisë së Prokurimeve: A nuk e shihni në sistem se kjo kompani nuk mund të kryejë në afat dhe më cilësi të dyja këto kontrata, të fituara njëkohësisht, të dhëna nga Peleshi dhe Xhemali?
Bashkëfituesi i kontratës është pjesë e oligarkisë së ndërtuesve të emëruar nga kryeministri me titullin “investitor strategjik”. Me kontratë 1 euro, kryeministri i ka dhënë Xhetan Ndregjonit pjesën e luanit nga Porti i Vlorës.
Më datë 13.10.2021, me anë të Vendimit të Këshillit të Ministrave Nr. 599, u miratua lidhja e kontratës së qirasë, me tarifën 1 euro/kontrata, ndërmjet Ministrisë së Financave dhe Ekonomisë dhe Bashkimit të Shoqërive “Marina di Valona” sh.p.k., “Brunes” sh.p.k., “Ndregjoni” sh.p.k. dhe “Marina Projects” LTD.
Kontrata 1 euro shërben për ndërtimin e hoteleve me vlerë 105 milionë Euro (pa TVSH). Kjo kontratë është e vlefshme për një periudhë 20 vjeçare.
Pra, sipas “standardeve” të qeverisë, të dy biznesmenët janë të denjë për të bashkëpunuar me drejtorin famëkeq të morgut./Gijotina.com
