Kreu i Partisë Demokratike Lulzim Basha, ka deklaruar se nuk ka tentuar që të komunikojë me kryeministrin Edi Rama gjatë periudhës së koronavirusit në vend.
Në një intervistë për ‘Opinion’ Basha tha se opozita kishte propozuar një plan konkret për masat, por qeveria po i haxhonte paratë për tendera, ku përmendi tenderin prej 200 mijë eurosh, para të cila do të investohen për zyrën e ministres së Infrastrukturës, Belinda Ballukut.
LEXO: Mes krizës së Covid-19, Ministria e Infrastrukturës shpenzon 200 mijë euro për ‘objekte luksi’!
“Ajo që bëmë ne nuk besoj që e ka bërë ndonjë opozitë tjetër më mirë se ne. I vumë një plan në dispozicion. Jo fjalë në erë, por plan. Por jo, para një jave 200 mijë euro për zyrën e Belinda Ballukut. Se kam bërë unë tenderin. A i ka letrat në rregull ajo? 200 mijë euro është shumë që shpenzohet për zyrën e Belinda Ballukut. Nuk e shpikëm por e gjeni aty. Nuk kam tentuar që të flisja me kryeministrin. Kur ne propozonim masa ai doli dhe shante. Përhapte panik dhe terror duke zgurdulluar sytë dhe thoshtë që shqiptarët do shkojnë për mish qeni. Regjimi nuk pret telefonatë nga opozita. Opozita e ka bërë shumëfish detyrën e saj. Nuk ka intereson e mira e qeverisë, por ajo e shqiptarëve prandaj propozuam një plan. Plani i hapjes? Do të testoja masivisht. Do bëja transparencë reale të shifrave.
I pyetur se cila është gjëja më e mirë që ka bërë qeveria, kryedemokrati u shpreh se nuk sheh asgjë të mire përveç propagandës, teksa shtoi se nëse qeveria do kishte një plan dhe do kishte treguar transparencë, Shqipëria do të ishte shumë më e hapur.
“Propagandën e ka qarë. Regjimi i Facebook-ut. Kemi një qeveri të paaftë dhe të pakicës së oligarkëve. Ka 7 vjet që u rrit taksat shqiptarëve. Tani paratë shkojnë prapë për oligrakët. E dinë të gjithë brenda PS-së që iceneratorët, Edi Rama, Ahmetaj dhe Veliaj ia kanë dhënë bandës së Lushnjes dhe po vjedhin shqiptarët. Për mashtrimet dhe vjedhjet unë iu jap 10 me yll. Nëse qeveria do të kishte pasur një plan, nëse qeveria do të kishte treguar transparencë dhe mirëmenaxhim për krizën, sot Shqipëria do të ishte shumë më e hapur, do të ishte në një stad shumë të përparuar të hapjes dhe nuk do të kishim këtë gjendje, ku pandemisë së virusit tani i bën konkurrencë, madje është bërë po aq e rrezikshme, për të mos thënë më e rrezikshme, pandemia ekonomike. “
