Të paktën 129 persona kanë humbur jetën si pasojë e përmbytjeve shkatërruese që kanë goditur zonën kodrinore të Teksasit, ndërsa ekipet e emergjencës vijojnë kërkimet për të zhdukurit.
Qarku Kerr rezulton më i godituri, me 103 viktima, përfshirë 36 fëmijë. Përballë kësaj tragjedie, Presidenti Donald Trump ka shpallur gjendjen e katastrofës për zonën, duke urdhëruar ndërhyrjen e Agjencisë Federale të Menaxhimit të Emergjencave, e cila tashmë ndodhet në terren.
Ndërkohë, paralajmërimet për përmbytje mbeten në fuqi në disa rajone të Teksasit, ku moti ekstrem po vijon të shkaktojë reshje intensive.
Sipas Shërbimit Kombëtar të Motit, në disa zona parashikohen deri në 30 cm reshje, me rrezik për përmbytje të menjëhershme, veçanërisht në jugun qendror të shtetit.
Zyra e Sherifit të Qarkut Kerr ka lëshuar një njoftim “kod të kuq” për banorët përgjatë lumit Guadalupe, duke u kërkuar të jenë të gatshëm për evakuim të mundshëm për shkak të përkeqësimit të kushteve atmosferike.
Operacionet e kërkim-shpëtimit vijojnë në kushte të vështira, ndërsa autoritetet nuk përjashtojnë mundësinë e rritjes së mëtejshme të numrit të viktimave.
