Teksa të gjithë janë alarmuar nga Coronavirusi, në Berat 4 pacientë janë konfirmuar me gripin AH1N1 ose siç njihet ndryshe ‘gripi i derrit’.
4 rastet janë konfirmuar nga mjekët e infeksionistë të Spitalit Rajonal Berat, teksa mjekja e infeksioniste në Spitalin Rajonal të Beratit, Etleva Vila konfirmon se ka pasur edhe raste të tjera të komplikuara e me probleme plomonare, edhe pse nuk kanë qenë raste të rënda.
Vila thotë se të gjitha rastet me komplikacione janë trajtuar me ndihmë të specializuar mjekësore dhe pasi janë përmirësuar janë dërguar në shtëpi dhe situata ndodhet nën kontroll.
Mjekja thotë se në Spitalin Rajonal të Beratit është ngritur një repart karantine, por duke qenë se mundësitë e spitalit janë të pakta, për rastet e komplikuara,stafi mjekësor merr kampione tamponesh, i analizon në ISHP dhe i dërgojnë në Tiranë.
Kujtojmë se virusi AH1N1 shfaq simptoma të njëjta me viruset e tjera, si dhimbje koke, dhimbje muskulare të forta, kollë të thatë dhe është shfaqur për herë të parë në vitin 2009, kur infektoi njerëz në të gjithë botën.
Ndërkohë bëhet me dije se një tjetër pacient, i cili kishte ardhur nga Skrapari ka shfaqur probleme të rënda me rrugët respiratore dhe është transportuar me urgjencë drejt Tiranës në QSUT, por nuk dihet ende se çfarë problemi ka.
