Aktivisti Aulon Kalaja ka treguar në protestën e sotme se ai ndodhej brenda në Teatrin Kombëtar kur fadromat kishin nisur shembjen e godinës.
Kalaja ka marrë mikrofonin duke u ngjitur në podium për t’u treguar të gjithëve, madje edhe kryeministrit Rama se i është rrezikuar jeta.
Kalaja tha se 30 sekonda para se të shembej godina e teatrit, ai ndodhej brenda dhe nuk kishte as valë në telefon.
Pasi u betua se kjo gjë ishte e vërtetë, Kalaja tha se i ishte vënë jeta në rrezik e se RENEA-t që kishin ardhur të armatosur, nuk e kishin vënë re fare.
“Unë kam qenë një nga ata që e kam gdhirë tek godina e Teatrit Kombëtar.
Na erdhi RENEA, me automatikë të mëdhenj e të vegjël dhe na zbarkoi. Kishin marrë masat mjeshtrat dhe ne morëm një vendim për të qëndruar tek Teatri Eksperimental.
Isha brenda bashkë me katër persona. S’kisha as valë në telefon. Sapo dola nga aty, për 30 sekonda u shemb dhe u bë goditja.
Ju betohem, isha brenda dhe kisha fadromën në kokë,”– tha Kalaja.
