Një vatër zjarri është aktivizuar në Malin e Thatë në Pogradec. Punonjësit e Zonave të Mbrojtura janë nisur në operacion për shuarjen e flakëve që prej mëngjesit, ndërsa bëhet me dije se është djegur një sipërfaqe kullotë. Parapralisht dyshohet për zjarrvëne të qëllimshme.
Zjarri është në kufi me Parkun Kombëtar të Galiçicës dhe po punohet për izolimin e tij.
Ndërkohë, një tjetër vatër zjarri është shfaqur në juglindje të vendit, në fshatin Mançurisht. Zjarrfikësja është nisur drejt vendit të ngjarjes, ndërsa aktualisht flakët nuk përbëjnë rrezik.
Kujtojmë që vendi ynë u përfshi nga zjarret muajin e kaluar, të cilat fatkeqësisht shkaktuan dy viktima në fshatin “Asim Zeneli” në Gjirokastër. Një 60-vjeçar ndërroi jetë në përpjekjepër të shuar flakët në oborrin e banesës së tij, ndërsa më vonë humbi jetën në spital edhe bashkëshortja e tij.
Ndërkohë, për disa ditë më radhë situate ishte kritike mbi Tunelin e Kalimashit, ku flakët u shuan pas ndihmës që erdhi nga FSK dhe zjarrfikësja e Kosovës.
Po ashtu, Mekanizmi i BE për Mbrojtjen Civile dërgoi në Shqipëri tre helikopterë për shuarjen e zjarreve, dy prej të cilëve nga Holanda e një nga Çekia, të cilët u largan disa ditë më parë pasi përfunduan me sukses operacionet për shuarjen e flakëve.
