Një person ka mbetu i plagosur si pasojë e të shtënave me armë këtë të premte në zonën e Xhafzotajt në Shijak. Policia bën me dije se një konflikt mes dy personave, për motive të dobta ka degraduar në përdorimin e armëve. Arbër Hoxha ka plagosur në këmbë shtetasin Enidor Dedja, i cili ndodhet jashtë rrezikut për jetën. Po punohet për kapjen e autorit.
NJOFTIMI ZYRTAR
Shijak/ Informacion paraprak
Rreth orës 11:15, dyshohet se gjatë një konflikti të çastit, për motive të dobëta, është plagosur me armë zjarri në këmbë shtetasi E. D.,36 vjeç, banues në Shijak, i cili është në kujdesin e mjekëve, jashtë rrezikut për jetën.
Shërbimet e Policisë, me marrjen e njoftimit, shkuan menjëherë në vendin e ngjarjes dhe falë veprimeve të shpejta hetimore bënë të mundur identifikimin e autorit të dyshuar shtetasit A. H., 30 vjeç, banues në Durrës dhe vijon krehja e zonës për kapjen e tij.
Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes.
