Disa të shtëna me armë zjarri janë regjistruar këtë mesditë pranë plazhit të Zvërnecit, në Vlorë. Policia njofton se shtetasi L. RR., rreth 42 vjeç, dyshohet se pas një konflikti të çastit, ka qëlluar me armë zjarri në ajër dhe më pas është larguar me shpejtësi.
“BW” raporton se ka qëlluar shtetasi i identifikuar si Luçio Rroko, ndërsa policia vijon krehjen e zonës për kapjen e tij. Deri më tani, shtetasi Luçio Rroko nuk është ndaluar ende nga forcat e Policisë, si dhe nuk dihen detaje apo motivi se pse ky shtetas ka qëlluar me armë në një zonë të populluar.
Njoftimi i policisë Së Shtetit:
Qëlloi me armë zjarri në ajër pas një konflikti të çastit, identifikohet dhe shpallet në kërkim autori i dyshuar. Më datë 22.07.2021, në Zvërnec, Vlorë, shtetasi L. RR., rreth 42 vjeç, dyshohet se pas një konflikti të çastit, ka qëlluar me armë zjarri në ajër dhe më pas është larguar me shpejtësi.
Pas marrjes së informacionit menjëherë në vendngjarje kanë mbërritur shërbimet e policisë ku falë veprimeve të shpejta bënë identifikimin e autorit të dyshuar. Shërbimet e Policisë po krehin zonën për kapjen e 42 vjeçarit si dhe identifikimin e personave të tjerë të përfshirë në konflikt.
Grupi hetimor nën drejtimin e Prokurorisë po vijon punën për zbardhjen e plotë të rrethanave të ngjarjes”, shkruhej në njoftimin e Policisë.
