Një incident me të shtënat me armë zjarri është regjistruar këtë të enjte në Berat, ku dy persona kanë denoncuar se janë qëlluar në drejtim të tyre nga dy individë që lëviznin me automjet në lagjen “Donika Kastrioti”, afër spitalit.
Sipas njoftimit të Policisë, nga të shtënat nuk ka pasur të lënduar.
Pas marrjes së njoftimit, forcat e policisë dhe grupi hetimor janë dërguar menjëherë në vendngjarje.
Falë reagimit të shpejtë dhe hetimeve paraprake, janë identifikuar dy autorët e dyshuar, por për arsye hetimi, gjeneralitetet e tyre nuk janë bërë të ditura.
Shërbimet e Policisë kanë ngritur pika kontrolli në hyrje-dalje të qytetit dhe vazhdojnë të kontrollojnë zonën për kapjen e autorëve.
Grupi hetimor, në bashkëpunim me Prokurorinë, po punon për zbardhjen e rrethanave dhe dokumentimin ligjor të ngjarjes.
