Pasditen e sotme janë regjistruar momente paniku në qytetin e Sarandës. Mësohet se një makinë, në hyrje të qytetit nuk i është bindur forcave policore për të ndaluar, duke kryer manovra të rrezikshme.
Gjatë këtij akti, automjeti ka goditur efektivin e policisë R. Ç. Raportohet se policia i është kundërpërgjigjur me të shtëna armësh mjetit, në tentativë për ta ndaluar.
Deri më tani drejtuesi i mjetit ende nuk është kapur, ndërkohë është gjetur dhe një armë zjarri, që besohet se i përket atij.
Sipas informacioneve paraprake, i dyshuari gjatë largimit ka hedhur në det edhe një armë zjarri që e mbante me vete.
Pas pak për ngjarjen pritet të ketë edhe një njoftim zyrtar nga drejtoria e Policisë.
Policia ndërkohë ka shtuar kontrollet në zonë, ndërsa në operacion po merr pjesë edhe mjeti lundrues i policisë që po kryen inspektime në breg të detit.
Kujtojmë se viti 2022 ka shënuar një bilanc të lartë aksidentesh vetëm në tre ditët e para të tij, ku u regjistruan 9 aksidente rrugore me 14 të plagosur dhe një viktimë.
Një aksident u regjistrua në aksin rrugor Peshkopi-Maqellarë, i cili i mori jetën një 30-vjeçari që u bë viktima e parë nga aksidentet rrugore për 2022-shin. Mjeti tip “Volkswagen Passat” ka dalë nga rruga duke lënë të plagosur edhe tre të tjerë, A. H, D. H, dhe P. H, nga 21 në 27 vjeç.
Aksidenti i parë u shënua më 1 janar në Elbasan. Një automjet përplasi në aksin Gostimë-Mollas një 15-vjeçar, i cili pësoi dëmtime të lehta.
Më 2 janar, u regjistruan 5 aksidente rrugore, ku mbetën të plagosur 8 qytetarë. Në fshatin Rrilë të Lezhës, një mjet doli nga rruga dhe përfundoi në kanal, e kështu me rradhë deri në ditën e sotme që aksidentet e të shtënat me armë zjarri nuk kanë të mbaruar.
