Një incident i rëndë me armë zjarri ka tronditur mbrëmjen e djeshme lindjen e Torontos, ku të paktën 12 persona kanë mbetur të plagosur nga të shtënat në një lokal. Sipas raportimeve të mediave ndërkombëtare, autori i dyshuar ndodhet ende në arrati. Ai kishte veshur një kapuç të zi dhe u largua nga vendngjarja me një automjet gri.
Autoritetet kanë bërë thirrje qytetarëve të shmangin zonën, ndërsa ekipet e ndihmës së shpejtë raportuan për një skenë krimi të rëndë pranë qendrës tregtare Scarborough Town Centre. Të plagosurit kanë pësuar lëndime të ndryshme, disa më të lehta dhe disa në gjendje kritike. Sipas Sky News, katër prej tyre kanë marrë plagë që nuk rrezikojnë jetën, por për të tjerët ende nuk ka informacione të plota mbi gjendjen shëndetësore, moshën apo gjininë. Disa janë dërguar me urgjencë në një qendër traume për trajtim të specializuar.
Një zëdhënës i Shërbimeve të Zjarrfikësve të Torontos konfirmoi për CBC News se ekipet e emergjencës mbërritën menjëherë pas raportimeve për të shtëna me armë zjarri aktive. Megjithatë, autoritetet ende nuk kanë ndarë informacione mbi motivin e mundshëm të sulmit.
Ndërkohë, kryebashkiakja e Torontos, Olivia Chow, ka reaguar mbi ngjarjen, duke bërë me dije se ka biseduar me shefin e policisë, Myron Demkiw, i cili ka konfirmuar nisjen e hetimeve.
“Ky është një hetim i hershëm dhe në vazhdim – policia do të japë detaje të mëtejshme. Mendimet e mia janë me të plagosurit dhe familjet e tyre,” – shkroi ajo në rrjetet sociale.
